13-мамыр 2025-жылы сағат 10:00-де Әбілхан Кастеев атындағы ҚР Мемлекеттік өнер музейінің Орталық көрме залында (Желтоқсан 137), Алматы қаласы Білім басқармасының «Өнер мектебі» ҚМҚК-ның ұйымдастыруымен, «Бояулар құпиясы» атты жас суретшілердің Республикалық байқауы көрмесінің қалалық кезеңі өтеді.
22-сәуірде Орталық көрме залында Алматы қаласы бойынша аудандық кезеңдердің жеңімпаздары арасында өткен байқаудың қорытындысы шығарылды. Байқауға 12-17 жас аралығындағы балалар қатысты.
Байқау жұмыстарын бағалау кезінде тақырып пен идея тереңдігі, мағынасы мен көркемдік шеберлігі, күрделілік деңгейі, түпнұсқа пен әсерлілік, композициялық құрылым, түстік шешіммен қатар, шығармашылық тәсіл ескерілді. Байқаудың мақсаты – жас суретшілердің шығармашылық қабілеттерін дамыту, олардың кәсіби бағдарларын ынталандыру. Байқаудың міндеті – жас суретшілерде эстетикалық, гуманистік және патриоттық сезімдерді қалыптастыру, әлемдік және отандық өнер дәстүрлеріне жеке қызығушылықтарын ояту болып табылады.
Байқаудың қорытынды кезеңінде – көрме өткізумен қатар, көрермендер назарына «Қазақстанның бояулары: Менің үйім – Қазақстан Республикасы», «Тірі планета», «Бейбітшілік пен мейірімділік біздің қолымызда» номинациялары бойынша, 55 шығармашылық жұмыс ұсынылады. Суреттердің ерекшелігі – олардың түрлі-түсті болуы, детальдарға үлкен назар аударылуы, мұқият өңделуі керек. Отанына арналған сюжеттер шын жүректен туған жеріне деген сүйіспеншілік сезіміне толы. Жас суретшілер шығармашылығы Қазақстан үшін маңызды символдармен – Күн, аспанда ұшып жүрген бүркіт, кең даланың ат табындары, қар жамылған шыңдар, асқақ таулар, ақ киіз үйлер және бақытты, бейбіт өмірдің негізі ретінде отбасы нышандарымен толтырылған. Сюжет желісіне ұлттық колорит беретін стилизацияланған қазақ ою-өрнектері үйлесімді және табиғи түрде енеді. «Тірі планета» номинациясындағы жұмыстар жас дарындардың біздің планетамыздың экология мәселелеріне белсенді қатысуын көрсетеді. Олар оған әлемдік көзқараспен қарап, өздерінің болашағы мен планета жағдайы өз қолдарында екенін түсінеді. «Бейбітшілік пен мейірімділік біздің қолымызда» номинациясынан – балалардың мейірімділікке, бір-біріне және қоршаған ортаға деген қамқорлық сезімдерін көруге болады. Авторлар өздерінің үй жануарларын ең нәзік түрде бейнелеуге тырысады. Шығармашылықтарында «Үлкенге-құрмет, кішіге-ізет» ұғымын негізге ала отырып, мейірімділік пен жанашырлық танытудың маңыздылығын бейнелейді.
Қосымша көркем білім берудің маңызы ерекше, өйткені ол жас ұрпақтың шығармашылық әлеуетін дамытуға және олардың тұлғалық қалыптасуына үлкен әсер етеді. Балаларды көркем мектептерде оқыту мүмкіндігін кеңейту, олардың гармониялық тұлғасын тәрбиелеу, шығармашылық потенциалын дамыту қажет. Мұндай байқаулар мен көрмелер қатысушыларға өздерін сезінуге, өзіне деген сенімділікті арттыруға, дүниетанымын кеңейтуге және ойларын болашаққа бағыттауға мүмкіндік береді.
Көрме 2025 жылдың 22 мамырына дейін жалғасады.
Жұмыс уақыты: 10:00-19:00.
Демалыс: дүйсенбі.
Куратор: Айсұлу Үсентаева
