2024 жылдың 30 қазан күні сағат 16.00-де Әбілхан Қастеев атындағы Қазақстан Республикасы Мемлекеттік өнер музейінің Орталық көрме залында Мәлік Қайдаров және оның шәкірттерінің ұйымдастыруымен өткізілетін «Дара жол» атты көрменің ашылуы болады.
Көрмеге Мәлік Қайдаровпен қатар 12 суретші қатысып, экспозицияға 60 астам туынды ұсынылды. Олар: Ерлан Сейілхан, Сұлтан Аманжол, Ернат Иманбакиев, Айдос Сейдақұл, Маржан Авдылманапова, Балнар Абиолла, Қанат Алманбетов, Ырысгүл Оханова, Элена Фурса, Руслан Дайырбеков, Дидар Кайдаров, Талғат Жанасылов.
Мәлік Қайдаров Н.В.Гоголь атындағы көркемсурет училищесін (1988-1992) бітіргеннен кейін, В.И.Суриков атындағы Мәскеу мемлекеттік академиялық өнер институтында (1992-1999) «Қондырғылы кескіндеме» мамандығы бойынша білім алды. Бүгінгі күнге дейін 25 жыл бойы өзінің ұстаздық қызметін Абай атындағы Қазақ ұлттық педагогикалық университеті қабырғасында атқарып келеді. Осы білім ордасынан қаншама түлектер өз жолдарын тауып, өнер саласында биіктен көрінуде. Десе де Мәлік Қайдаров кейбір шәкірттері үшін өз ұстаздық міндетін әлі де жалғастыруда. Шығармашылық топ құрып, этюдтерге жиі шығады. Осы еңбектерінің қортындысы ретінде жыл сайын көрме өткізу дәстүрге енгізілді. Бұл осы топпен өткізіліп отырған екінші көрме.
Көрме атауы «Дара жол». Шәкіртері жас суретшілер. Ұстаз әрбір шәкірті шығармашылықта өзінің дара жолын тапса, Қазақстанның бейнелеу өнеріне өз үлестерін қосса, қанаттары талмай алысқа самғаса деген ниетте жол көсетуде. Райымбек Сейтіметовтың қалдырған «Өнер жолы – қиын жол. Оған талмайтын қанат, сарқылмайтын шабыт керек» деген өсиеті бар. Үміт артқан шәкірттері осы қиын жолдан сүрінбей өтіп, еліміздің мақтанышына айналса деген ойын іске асыруда. Шәкірттерін өнердің әр ағымын иеленген Қазақ бейнелеу өнерінің майталмандары Жаңатай Шарденовтың, Салихитдин Айтбаевтың, Али Жүсіповтің, Абдрашид Сыдыхановтың, Кенжебай Дүйсенбаев сынды шеберлердің қалдырған дара жолдарына дұрыс бағыттап, жол көрсету мақсаты көзделген.
«Өнердің классикасы мәңгі жасаса деймін. Менің бүкіл өмірім осы жолға арналған. Ұстанымым – адалдық пен тазалық!» - дейді ұстаз Мәлік Қайдаров.
Осы шәкірттерімен шектеліп қалмай келешекте өз шәкірттері қатарын ары қарай толықтырып отыру жоспары да бар. Мәлік Қайдаров келешекте өз еңбегінің нәтижесіне және шәкірттерінің болашағына үлкен сенімділікпен қарайды.
Қатысып отырған суретшілер тайынбас еңбектерінің арқасында біраз шыңдарды бағындырып, өздерін Қазақстан бейнелеу өнерінің алдыңғы қатарында көрсетіп жүр. Олар қатысып жүрген халықаралық, республикалық, қалалық көрмелерін санап шығу мүмкін емес.
Суретшілердің ұсынып отырған шығармалары көрермендердің көңілінен шығатынына күмәніміз жоқ.
Қатысушыларға шығармашылық шабыт, табыс тілейміз.
Көрмеге қош келдіңіздер!
Көрмені 2024 жылдың 12 қарашасына дейін тамашалауға болады.
Көрме кураторы: Айсұлу Үсентаева
